ប្រទេសអេហ្ស៊ីប៖បណ្តាញសារព័ត៌មានសាហ្វាកញូវស៍អ៊ីរ៉ាក់បានចុះផ្សាយកាលពីថ្ងៃចន្ទថា រដ្ឋាភិបាលកណ្តាលនៃប្រទេសអ៊ីរ៉ាក់ កំពុងតែបង្កើតកងពលតូចយោធាចំនួនពីរ ដើម្បីការពារតំបន់ព្រំដែន ដែលស្ថិតនៅជាប់ជាមួយប្រទេសអ៊ីរ៉ង់។
លោក សាវ៉ាន ស៊ីនឌី អនុប្រធានគណៈកម្មាធិការសភាសន្តិសុខ និងការពារជាតិ បានប្រាប់
បណ្តាញសារព័ត៌មានថា៖ “កងពលតូចយោធាទាំងនេះ នឹងមានប្រជាជនអ៊ីរ៉ាក់ឃឺដ និងធនធានហិរញ្ញវត្ថុដែលទទួលបានពីកញ្ចប់ថវិកាសហព័ន្ធ ដែលនឹងត្រូវបានបែងចែកដើម្បីរៀបចំពួកគេ។ ” លោកបន្ថែមថា កងពលតូចយោធាទាំងនោះ នឹងត្រូវបានដាក់ពង្រាយនៅតាមព្រំដែននៃតំបន់ស្វយ័តឃឺដជាមួយប្រទេសអ៊ីរ៉ង់។
កាលពីសប្តាហ៍មុន ក្រុមប្រឹក្សាសន្តិសុខរបស់រដ្ឋាភិបាលអ៊ីរ៉ាក់ បានសម្រេចអនុម័ត វិធានការណ៍ជាច្រើនដើម្បីពង្រឹងកិច្ចការពារព្រំដែនជាមួយនឹងប្រទេសជិតខាងចំនួន២ផ្សេងទៀត បន្ទាប់ពីមានការទម្លាក់គ្រាប់បែកជាច្រើនគ្រាប់ទៅលើតំបន់ឃឺដនៃប្រទេសអ៊ីរ៉ាក់ ដោយកម្លាំងតួកគី និងកម្លាំងអ៊ីរ៉ង់។ ទាហានព្រំដែនអ៊ីរ៉ាក់ បានពង្រឹងប៉ុស្តិ៍យាមល្បាតចំនួន ១០កន្លែងនៅតាមបណ្តោយព្រំដែន ហើយកម្លាំងជំនួយក៏ត្រូវបានពង្រាយនៅទីនោះផងដែរ។ ការងារនៅតំបន់ព្រំដែនត្រូវបានជួយដោយអង្គភាពចារកម្មអ៊ីរ៉ាក់។
ចាប់តាំងពីចុងខែកញ្ញាមក កម្លាំងអ៊ីរ៉ង់បាន និងកំពុងវាយប្រហារទៅលើក្រុមឃឺដដែលមាន មូលដ្ឋាននៅក្នុងប្រទេសអ៊ីរ៉ាក់។ បើយោងតាមសាវាសារព័ត៌មាន អាចអាអិនអេ បានរាយការណ៍ថា មូលហេតុនៃការបង្កើតប្រតិបត្តិការនោះគឺដោយសារតែមានការប៉ុនប៉ងរបស់កម្លាំងឃឺដដើម្បីធ្វើឲ្យស្ថានការណ៍នៅក្នុងប្រទេសអ៊ីរ៉ង់មានអស្ថិរភាព។
គួររំលឹកផងដែរថា កម្លាំងតួកគីបានធ្វើការវាយប្រហារតាមអាកាសនៅភាគខាងជើងប្រទេស អ៊ីរ៉ាក់ និងប្រទេសស៊ីរីកាលពីយប់ថ្ងៃទី១៩ ខែវិច្ឆិកា រហូតដល់ព្រឹក ថ្ងៃទី២០ ខែវិច្ឆិកា។ ការវាយប្រហារនោះត្រូវបានធ្វើឡើងទៅលើមូលដ្ឋានរបស់គណបក្សពលករឃឺដ។ ប្រទេសតួកគីបានស្តីបន្ទោសលើគណបក្សពលករឃឺដ និងជនជាតិឃឺដស៊ីរី ចំពោះការវាយប្រហារភេរវកម្មនៅថ្ងៃទី១៣ ខែវិច្ឆិកានៅក្នុងទីក្រុងអ៊ីស្តង់ប៊ុលដែលបានសម្លាប់មនុស្ស ៦នាក់៕
ប្រែសម្រួល៖ប៉ោក លក្ខិណា
ប្រភពព័ត៌មាន tass ចុះផ្សាយថ្ងៃទី២៩ ខែវិច្ឆិកា ឆ្នាំ២០២២
