ប្រទេសអ៊ីស្រាអែល៖កម្លាំងអាកាសអ៊ីស្រាអែលបានវាយប្រហារតាមអាកាសកំណត់គោលដៅនៅក្នុងតំបន់ហ្កាហ្សាស្ទ្រីបកាលពីព្រឹកថ្ងៃអាទិត្យ ជាការឆ្លើយតបទៅនឹងការបាញ់គ្រាប់រ៉ូក្កែតចេញពីតំបន់ហ្កាហ្សានៅរយៈពេលប៉ុន្មានម៉ោងម៉ុន។
យោងតាមប្រភពព័ត៌មានពីកម្លាំងការពារជាតិអ៊ីស្រាអែលបានបញ្ជាក់ឱ្យដឹងថា ការវាយប្រហារតាមអាកាសបានកំណត់គោលដៅទៅលើទីតាំងផលិតអាវុធ ដែលជាកម្មសិទ្ធរបស់អង្គភាពក្រុមសកម្មប្រយុទ្ធហាម៉ាស់ ហើយទីតាំងនោះគឺជាកន្លែងដែលគ្រាប់រ៉ូក្កែតភាគច្រើននៅតំបន់ហ្កាហ្សាស្ទ្រីបកំពុងត្រូវបានផលិត។
នៅក្នុងសេចក្តីថ្លែងការណ៍ក៏បានបន្ថែមឱ្យដឹងផងដែរថា ផ្លូវរូងក្រោមដីរបស់ក្រុមសកម្មប្រយុទ្ធហាម៉ាស់រងការកំណត់គោលដៅ។
នៅរយៈពេលប៉ុន្មានម៉ោងមុនហេតុការណ៍វាយប្រហារតាមអាកាស គ្រាប់រ៉ូក្កែតមួយគ្រាប់ត្រូវបានបាញ់ចេញពីតំបន់ហ្កាហ្សាស្រ្ទីប ទៅកាន់ភាគខាងត្បូងនៃប្រទេសអ៊ីស្រាអែល។ ពុំទាន់មានអង្គភាពប៉ាឡេស្ទីនណាមួយចេញមុខទទួលខុសត្រូវចំពោះការបាញ់គ្រាប់រ៉ូក្កែត។ ហេតុការណ៍នោះ ពុំបានបណ្តាលឱ្យមានការខូចខាត ឬមានមនុស្សរងរបួសទេ។
កម្លាំងការពារជាតិអ៊ីស្រាអែលបានបន្ថែមឱ្យដឹងថា ការវាយប្រហារពេញមួយយប់គឺធ្វើឡើងដើម្បីរារាំងការបង្កើតកម្លាំងរបស់អង្គការភេរវករហាម៉ាស់។
គួរំលឹកផងដែរថា ក្រុមសកម្មប្រយុទ្ធហាម៉ាបានគ្រប់គ្រងលើតំបន់ហ្កាហ្សាស្ទ្រីបកាលពីឆ្នាំ២០០៧។ ចាប់តាំងពីពេលនោះមក កម្លាំងអ៊ីស្រាអែលបានបិទផ្លូវយ៉ាងតឹងរ៉ឹងនៅលើទឹកដី
ប៉ាឡេស្ទីន និងប្រឆាំងអង្គការដែលបង្កអរិភាពចំពោះប្រទេស។ កាលពីដើមសប្តាហ៍នេះ កម្លាំងអ៊ីស្រាអែលបានសម្លាប់សមាជិកដ៏សំខាន់ពីរនាក់របស់ក្រុមជីហាដអ៊ីស្លាមប៉ាឡេស្ទីននៅទីក្រុង ជេនីន ភាគខាងលិចតំបន់វ៉េសបេង។ ក្រោយមក ក្រុមជីហាដអ៊ីស្លាមប៉ាឡេស្ទីនបានប្រកាសថានឹងសងសឹកវិញ ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយឡើងវិញថ្ងៃទី០៥ ខែធ្នូ ឆ្នាំ២០២២
