ប្រទេសយេម៉ែន៖ប្រភពសន្តិសុខបានប្រាប់ភ្នាក់ងារសារព័ត៌មានថា កាលពីថ្ងៃអង្គារក្បួនរថយន្តនៃបេសកកម្មរបស់អង្គការសហប្រជាជាតិដើម្បីគាំទ្រដល់កិច្ចព្រមព្រៀងទីក្រុងហូដេសដាស់ ដែលហៅកាត់ថា UNMHA បានរួចផុតពីហេតុការណ៍ផ្ទុះមីនបង្កប់ក្រោមដីនៅក្នុងកំពង់ផែ រេដ ស៊ី នៃទីក្រុងហូដេសដាស់។
មន្ត្រីក្នុងតំបន់និយាយក្នុងលក្ខណ្ឌអនាមិកថា៖ “ក្បួនរថយន្តនៃបេសកកម្ម UNMHA រងការវាយប្រហារដោយហេតុការណ៍ផ្ទុះគ្រាប់មីនបង្កប់ក្រោមដី ខណៈដែលពួកគេកំពុងធ្វើដំណើរនៅក្នុងស្រុក អាល់ ហាលី នៃទីក្រុងហូដេសដាស់”។ លោកបានបញ្ជាក់ឱ្យដឹងថា ហេតុការណ៍ផ្ទុះនោះពុំបានបង្ករបួសដល់នរណាម្នាក់នោះទេ ប៉ុន្តែបានបង្កការខូចខាតដល់ផ្នែកខ្លះនៃរថយន្ត២គ្រឿង។
លោកបានអះអាងថា៖ “មន្ត្រីនៃក្រុមឧទ្ទាមហ៊ូធីកំពុងអមដំណើរលោក ឧត្តមសេនីយ មីជ ឆែល ប៊ែរ៉ី ប្រធានបេសកកម្ម UNMHA នៅពេលដែលហេតុការណ៍ផ្ទុះបានកំណត់គោលដៅទៅលើក្បួនរថយន្តរបស់អង្គការសហប្រជាជាតិនៅទីក្រុងហូដេសដាស់”។
មន្ត្រីនៅក្នុងមូលដ្ឋានម្នាក់ទៀតបាននិយាយថា ប្រធាននៃបេសកកម្ម UNMHA និងមន្ត្រីនៃឧទ្ទាមហ៊ូធី កំពុងតែធ្វើដំណើរទៅត្រួតពិនិត្យនូវកិច្ចការបំផ្លាញជាតិផ្ទុះ និងគ្រាប់មីនក្នុងបរិមាណដ៏ច្រើននៅទីក្រុងហូដេសដាស់។
អ្នកជំនាញដោះមីនរបស់រដ្ឋាភិបាលបាននិយាយថា កន្លងមកមានគ្រាប់មីនច្រើនជាង ១លានគ្រាប់ ត្រូវបានបង្កប់ចាប់តាំងពីការផ្ទុះឡើងនៃសង្គ្រាមស៊ីវិលយេម៉ែននៅចុងឆ្នាំ២០១៤ នៅពេលដែលក្រុមឧទ្ទាមហ៊ូធីដណ្តើមបានការគ្រប់គ្រងលើខេត្តមួយចំនួននៅភាគខាងជើង និងបានបង្ខំឱ្យរដ្ឋាភិបាលយេម៉ែនចាកចេញពីទីក្រុងសាណា៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែធ្នូ ឆ្នាំ២០២២
