ប្រទេសអ៊ីរ៉ាក់៖ក្រុមសកម្មប្រយុទ្ធរដ្ឋអ៊ីស្លាម ២នាក់ និងទាហានប៉ារ៉ាហាស់ស្ហាប៊ី ២នាក់ ត្រូវបានសម្លាប់កាលពីថ្ងៃអង្គារ ក្នុងអំឡុងពេលប៉ះទង្គិចគ្នានៅតំបន់ជនបទភាគខាងត្បូងទីក្រុងបាកដាដ នៃប្រទេសអ៊ីរ៉ាក់។
លោក យ៉ាហៀ រ៉ាស៊ូល អ្នកនាំពាក្យអគ្គមេបញ្ជាការកម្លាំងអ៊ីរ៉ាក់ បាននិយាយនៅក្នុងសេចក្តីថ្លែងការណ៍មួយថា ដោយផ្អែកលើរបាយការណ៍ស៊ើបការណ៍សម្ងាត់ កម្លាំងសន្តិសុខអ៊ីរ៉ាក់ បានធ្វើប្រតិបត្តិការនៅក្នុងតំបន់អាល់បាស់បាហានី ដែលមានចម្ងាយប្រមាណជា ៦៥គីឡូម៉ែត្រ ពីភាគខាងត្បូងទីក្រុងបាកដាដ ហើយហេតុការណ៍ប៉ះទង្គិចគ្នានោះបានកើតឡើងជាមួយក្រុមឧទ្ទាមរដ្ឋអ៊ីស្លាម IS ២នាក់ ដែលកំពុងពាក់ខ្សែរក្រវ៉ាត់បំផ្ទុះ។
លោក រ៉ាស៊ូល បាននិយាយថា កម្លាំងទ័ពបានសម្លាប់ក្រុមសកម្មប្រយុទ្ធម្នាក់ និងបង្ករបួសដល់ក្រុមសកម្មប្រយុទ្ធម្នាក់ទៀត ដែលបានរត់ភៀសខ្លួនចេញពីទីកន្លែងកើតហេតុ ប៉ុន្តែក្រោយមកក៏ត្រូវបានកម្លាំងអ៊ីស្រាអែលសម្លាប់នៅពេលដែលបានដេញតាមចាប់ខ្លួន។
នៅក្នុងសេចក្តីថ្លែងការណ៍ដោយឡែកពីគ្នាមួយផ្សេងទៀតបានបញ្ជាក់ឱ្យដឹងថា កម្លាំងទាហានប៉ារ៉ាហាស់ស្ហាប៊ី បាននិយាយថា កម្លាំងរបស់ពួកគេបានចូលរួមប្រយុទ្ធគ្នានៅក្នុងតំបន់អាល់បាស់បាហានី។
គួររំលឹកផងដែរថា កាលពីរយៈពេលប៉ុន្មានខែមុននេះ កម្លាំងសន្តិសុខអ៊ីរ៉ាក់បានធ្វើប្រតិបត្តិការប្រឆាំងនឹងក្រុមសកម្មប្រយុទ្ធជ្រុលនិយម ជាការឆ្លើយតបចំពោះការបង្កើនការវាយប្រហាររបស់ពួកគេ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៧ ខែធ្នូ ឆ្នាំ២០២២
