ចៅក្រមឥណ្ឌូនេស៊ីបានបញ្ជាក់កាលពីថ្ងៃទី០៧មេសាបានអះអាងថា ខ្លួននឹងធ្វើប្រតិបត្តិការកាត់ទោសអ្នកជួញដូរគ្រឿងញៀនបន្តទៀតនៅឆ្នាំនេះ។ បើតាមអគ្គមេធាវីឥណ្ឌូនេស៊ីលោកPrasetyoបាននិយាយថា មនុស្សជួញដូរគ្រឿងញៀនជាច្រើននាក់ក្នុងនោះមានជនបរទេសមួយភាគបី នឹងត្រូវកាត់ទោសប្រហារជីវិត នៅឆ្នាំ២០១៦នេះ។ លោកPrasetyoថា“ យើងកំពុងតែផ្ដោតសំខាន់ទៅលើអ្នកទោសគ្រឿងញៀន ហើយយើងនឹងមិនបញ្ឈប់ការកាត់ទោសប្រហារជីវិតអ្នកជួញដូរគ្រឿងញៀនឡើយ ព្រោះនេះជាច្បាប់ក្នុងប្រទេស”។ បន្ថែមលើនេះ “យើងនឹងបង្កើនការចាត់វិធានការប្រឆាំងអ្នកជួញដូរគ្រឿងញៀន”។ យ៉ាងណាក៏ដោយ លោកអគ្គមេធាវីឥណ្ឌូនេស៊ីបដិសេធមិនបញ្ចេញឈ្មោះ អ្នកទោសត្រូវប្រហារជីវិតនៅឆ្នាំ២០១៦នេះ។
ប៉ុន្តែលោកអគ្គមេធាវីឥណ្ឌូនេស៊ីបានអះអាងថា មនុស្សជាង១៣០នាក់ត្រូវកាត់ទោសប្រហារជីវិត ភាគច្រើនជាប់ចោទពីបទឧក្រិដ្ឋកម្មគ្រឿងញៀន។ ក្រៅពីនេះ អាជ្ញាធរឥណ្ឌូនេស៊ីនឹងបង្ក្រាបការកេងប្រវ័ញ្ចលើកុមារ ការប្រើអំពើហិង្សាលើកុមារ និងការរំលោភផ្លូវភេទលើកុមារ។ បើតាមអង្គការUNICEFបានអះអាងថា កុមារឥណ្ឌូនេស៊ីរាប់ម៉ឺននាក់ ត្រូវបានគេយកជួញដូរជារៀងរាល់ថ្ងៃ ហើយកុមារទាំងនោះ ភាគច្រើនបង្ខំធ្វើពេស្យាចារ។
អ្នកនាំពាក្យប៉ូលីសក្រុងហ្សាតាកា លោកMohammad Iqbalបានអះអាងដែរថា ពាក់ព័ន្ធនឹងការរំលោភបំពានលើកុមារ ប៉ូលីសឬអាជ្ញាធរក្នុងប្រទេសត្រូវតែធ្វើការកែលម្អឡើងវិញ ដើម្បីទប់ស្កាត់អំពើហិង្សាលើកុមារ។ ពាក់ព័ន្ធនឹងបញ្ហានេះ អាជ្ញាធរឥណ្ឌូនេស៊ីបានបញ្ជាក់ថា ខ្លួនបានចាប់ផ្ដើមធ្វើប្រតិបត្តិការល្បាតនៅតាមទីក្រុងហ្សាកាតា ដើម្បីប្រឆាំងការរំលោភបំពានលើកុមារ។
គួរបញ្ជាក់ថា កាលពីឆ្នាំមុន ឥណ្ឌូនេស៊ីបានកាត់ទោសប្រហារជីវិតមនុស្ស១៤នាក់ ក្នុងនោះជនជាតិអូស្ត្រាលី ជនជាតិប្រេស៊ីល ជនជាតិហូរឡង់ ជនជាតិនីហ្សេរីយ៉ា។ ការប្រហារជីវិតកាលណោះ ត្រូវបានរដ្ឋាភិបាលបរទេស អង្គការអន្តរជាតិ រួមទាំងសកម្មជនមួយចំនួនបានទទូចសុំអង្វរឱ្យ រដ្ឋាភិបាលឥណ្ឌូនេស៊ី និងចៅក្រុមត្រូវតែកាត់បន្ថយទោស ដោយមិនប្រើច្បាប់ប្រហារជីវិត។ ទោះបីជា មានការអង្វរពីប្រទេសជិតខាងនិងអង្គការអន្តរជាតិ ឥណ្ឌូនេស៊ីមិនស្ដាប់ហេតុផលឡើយ ហើយបានអះអាងថា នេះជាច្បាប់នៅក្នុងប្រទេសឥណ្ឌូនេស៊ីមិនអាចរំលោភបំពានជាដាច់ខាត៕
