ប្រភពព័ត៌មាន CNN ចុះផ្សាយថ្ងៃទី ០១ ខែឧសភា ឆ្នាំ ២០១៨
នៅថ្ងៃអង្គារ៍ មានមនុស្សយ៉ាងហោចណាស់ ២៤ នាក់ស្លាប់ ក្នុងហេតុការណ៍ផ្ទុះគ្រាប់បែកចំនួន ០២ លើក នៅភាគខាងជើងប្រទេសនេហ្ស៊ីរីយ៉ា។ ហេតុការណ៍នេះកើតឡើងក្នុងទីក្រុង Mubi នៅរដ្ឋ Adamawa នៅវេលាម៉ោង ០១ រសៀល ខណៈពេលដែលអ្នកគោរពបូជាប្រមូលផ្តុំគ្នាសម្រាប់ការអធិស្ឋាន។
អ្នកនាំពាក្យម្នាក់របស់ប៉ូលិសរដ្ឋ Adamawa ប្រាប់ទូរទស្សន៍ CNN ថា គ្រាប់បែកទាំងនោះត្រូវគេដាក់នៅទីតាំងផ្សេងគ្នាជុំវិញវិហារអ៊ីស្លាម។ អ្នកបំផ្ទុះគ្រាប់បែកលើកដំបូងចូលក្នុងវិហារអ៊ីស្លាមខណៈពេលដែលមនុស្សកំពុងអធិឋាន ហើយការបំផ្ទុះគ្រាប់បែកពេលនោះសម្លាប់មនុស្ស ០៤ នាក់នេះយោងតាមប្រភពព័ត៌មានពីលោក Othman Abubakar ប្រាប់សារព័ត៌មាន CNN ។
ប្រភពបន្ថែមថា អ្នកគោរពបូជាភៀសខ្លួនពីវិហារអ៊ីស្លាម ហើយអ្នកបំផ្ទុះគ្រាប់បែកទី ០២ ដែលមានចម្ងាយប្រហែលពីរបីរយម៉ែត្រក៏បំផ្ទុះឧបករណ៍របស់គាត់សម្លាប់មនុស្ស ២០ នាក់ផ្សេងទៀត។ ការបំផ្ទុះគ្រាប់បែកនេះកើតឡើងក្រោយពីមានអ្នកបំផ្ទុះគ្រាប់បែក អត្តឃាតសម្លាប់មនុស្ស ០៤ នាក់នៅតំបន់ Maiduguri ក្នុងរដ្ឋ Borno ។ វាក៏បានកើតឡើងមួយថ្ងៃក្រោយពីលោកប្រធានាធិបតី Buhari របស់នីហ្សេរីយ៉ាជួបជាមួយលោក Trump នៅឯសេតវិមាន និងពិភាក្សាអំពីបញ្ហាប្រឈមផ្នែកសន្តិសុខដែលប្រទេស នេះប្រឈមមុខរួមទាំងការបះបោរជិតមួយទសវត្សរ៍ដោយក្រុមភេរវជន Boko Haram នៅភាគឦសាននៃប្រទេស៕
