ប្រភពព័ត៌មានពីRT ចេញផ្សាយថ្ងៃទី២១ ខែឧសភា ឆ្នាំ២០១៨
ប្រព័ន្ធការពារអាកាសប្រទេសអារ៉ាប៊ីសាអូឌីតត្រូវគេរាយការណ៍ថា បានរារាំងមីស៊ីលផ្លោងដែលបាញ់ចេញពីយេម៉ែនបន្ទាប់ពីពួកឧទ្ទាម Houthisជាអ្នកបាញ់ទៅគោលដៅ “ព្រលានយន្តហោះយោធា” នៅក្នុងទីក្រុងJizan។
ប្រព័ន្ធផ្សព្វផ្សាយក្នុងស្រុករាយការណ៍ថា មីស៊ីលប្រភេទ Scud ត្រូវបំផ្លាញមុនពេលគ្រាប់ផ្លោងវាយប្រហារគោលដៅនៅក្នុងទីក្រុងកំពង់ផែដែលស្ថិតនៅភាគនិរតីនៃប្រទេសអារ៉ាប៊ីសាអូឌីត និងភាគខាងជើងព្រំដែនយេម៉ែន។
មុននេះបន្តិច ប្រព័ន្ធការពារអាកាសអារ៉ាប៊ីសាអ៊ូឌីតត្រូវរាយការណ៍ថា បានស្ទាក់ចាប់មីស៊ីលផ្លោងមួយផ្សេងទៀតដែលហោះសំដៅទៅព្រលានយន្តហោះយោធាក្បែរព្រំប្រទល់ភាគខាងត្បូង។
ការបាញ់នៅព្រឹកថ្ងៃចន្ទនេះ គឺជាការវាយប្រហារចុងក្រោយបង្អស់ និងជាបន្តបន្ទាប់លើទីតាំងប្រទេសអារ៉ាប៊ីសាអ៊ូឌីតដែលមានភាពតានតឹងខ្លាំងកាលពីចុងសប្តាហ៍។
រដ្ឋធានីRiyadh ចោទប្រកាន់ប្រទេសអ៊ីរ៉ង់ចំពោះការទទួលខុសត្រូវបាញ់មីស៊ីលផ្លោងចេញពីប្រទេសយេម៉ែន ដោយព្រមានថាជា«ទង្វើនៃសង្គ្រាម»ខណៈដែលសាធារណរដ្ឋអ៊ីស្លាមបដិសេធយ៉ាងម៉ឺងម៉ាត់ចំពោះការចោទប្រកាន់បែបនេះ៕
