ព្រឹទ្ធសភារបស់បូលីវីអនុម័តច្បាប់លុបចោលជ័យជម្នះរបស់ Evo Morales នៅក្នុងការបោះឆ្នោតប្រធានាធិបតីខែតុលាដែលត្រូវធ្វើឡើងដោយរដ្ឋប្រហារដែលបានបង្ខំឱ្យគាត់ភៀសខ្លួនចេញពីប្រទេស។ ច្បាប់នេះក៏បើកទ្វារសម្រាប់ការបោះឆ្នោតថ្មីផងដែរ។
ព្រឹទ្ធសភាបញ្ជាក់នៅលើទំព័រធ្វីធើររបស់ខ្លួនថាច្បាប់ស្តីពីការបោះឆ្នោតថ្មីត្រូវបានអនុម័តជាឯកច្ឆន្ទ។ ច្បាប់នេះចាំបាច់ត្រូវទទួលការយល់ព្រមពីសភាជាន់ទាបនៃរដ្ឋសភាមុនពេលប្រធានាធិបតីបណ្តោះអាសន្នដែលប្រកាសដោយខ្លួនឯងលោកស្រី Jeanine Anez ចុះហត្ថលេខាលើច្បាប់នោះ។
ច្បាប់នេះលុបចោលលទ្ធផលនៃការបោះឆ្នោតខែតុលខណៈពេលដែលលោក Morales ទទួលជ័យជំនះយ៉ាងធំធេងនិងធ្វើឱ្យមានការតវ៉ាយ៉ាងខ្លាំង។ វាក៏អនុញ្ញាតឱ្យមានការបោះឆ្នោតថ្មីផងដែរដោយមិនកំណត់កាលបរិច្ឆេទជាក់លាក់នៅឡើយទេ។ច្បាប់នេះក៏រារាំងបេក្ខជនណាមួយដែលមុននេះមានមុខងារពីរពីការស្វែងរកការបោះឆ្នោតឡើងវិញដូច្នេះរារាំងប្រធានាធិបតីដែលត្រូវបណ្តេញចេញពីតំណែងដែលភៀសខ្លួនទៅប្រទេសម៉ិចស៊ិកូពីការចូលរួមការបោះឆ្នោតនាពេលថ្មីនេះ។
សភាបូលីវីក៏នឹងត្រូវបង្កើតតុលាការបោះឆ្នោតថ្មីដែលមានសមាជិក ៧ រូបផងដែរបន្ទាប់ពីអង្គប្រជុំដំបូងត្រូវរំសាយចោលចំពេលមានការចោទប្រកាន់ពីការបោះឆ្នោតថ្មីៗនេះ។ ក្រោយមកនៅថ្ងៃសៅរ៍សមាជិកព្រឹទ្ធសភាប្រឆាំងលោកស្រី Jeanine Anezដែលប្រកាសខ្លួនឯងថាជា“ ប្រធានាធិបតីបណ្តោះអាសន្ន” ធ្វើការច្រានចោលសេចក្តីព្រាងច្បាប់ដែលស្នើដោយចលនាដើម្បីសង្គមនិយម (MAS) របស់លោក Morales ដើម្បីផ្តល់ការលើកលែងទោសដល់ប្រធានាធិបតីដែលត្រូវទម្លាក់ពីតំណែង និងមន្ត្រីជាន់ខ្ពស់មួយចំនួនផងដែរ។
លោកស្រី Anez មានប្រសាសន៍ថា“ យើងមិនអាចផ្តល់ការការពារដល់អ្នកដែលបានធ្វើទុក្ខបុកម្នេញ បោកបញ្ឆោត និងបោកប្រជាជនបូលីវីឡើយ”៕
ប្រភព RT ចុះផ្សាយថ្ងៃទី ២៣ ខែវិច្ឆិកា ឆ្នាំ ២០១៩
