ប្រមុខប៉ូលិសនិយាយថាក្រុមការងារពិសេសមួយត្រូវណែនាំនៅក្នុងទីក្រុង Malmo ប្រទេសស៊ុយអែតដើម្បីប្រយុទ្ធប្រឆាំងនឹងអំពើហិង្សាដែលកំពុងកើនឡើង និងត្រូវពង្រីកដល់ទីក្រុងដទៃទៀត។ ប្រទេសស៊ុយអែតកំពុងរងគ្រោះដោយការបាញ់ប្រហារនិងការបំផ្ទុះគ្រាប់បែកដែលទាក់ទងនឹងក្រុមទំនើង។ ការវាយប្រហារដោយគ្រាប់បែកឈានដល់កម្រិតខ្ពស់ថ្មីមួយនៅក្នុងឆ្នាំ ២០១៩ ដែលមានឧប្បត្តិហេតុជាង ១៨០ រហូតមកដល់បច្ចុប្បន្ន។ ការផ្ទុះមួយនៅតំបន់ Linkoping ភាគខាងត្បូងប្រទេសស៊ុយអែតធ្វើឲ្យមនុស្ស ២០ នាក់រងរបួសកាលពីខែមិថុនា។
“ក្រុមប្រតិបតិ្តការ Hoarfrost” ត្រូវគេណែនាំនៅក្នុងទីក្រុង Malmo ក្នុងខែវិច្ឆិកាបន្ទាប់ពីក្មេងអាយុ ១៥ ឆ្នាំម្នាក់ត្រូវបាញ់សម្លាប់នៅក្នុងអ្វីដែលប៉ូលិសសង្ស័យថាជាផ្នែកមួយនៃសង្គ្រាមគ្រឿងញៀន។ ចាប់តាំងពីពេលនោះមកជនសង្ស័យប្រហែល ៤០ នាក់ត្រូវចាប់ខ្លួនពីបទឧក្រិដ្ឋកម្មជាច្រើនផងដែរ។
ថ្លែងប្រាប់វិទ្យុ Ekot លោក Anders Thornberg ប្រធានប៉ូលិសនិយាយថាក្រុមក្មេងទំនើងកាន់តែមានភាពសាហាវ និងមិនចេះគិតពិចារណាដោយព្យាយាមរកលុយ និងចំណាយប្រាក់យ៉ាងឆាប់រហ័សព្រោះពួកគេដឹងថាពួកគេអាចនឹងមិនរស់នៅលើសពី ២០ ឬ ៣០ ឆ្នាំ។
លោកនិយាយថាឧក្រិដ្ឋជនវ័យក្មេងចង់បង្កើតឋានានុក្រមក្រុមទំនើងលឿនជាងមុនដែលមានគ្រោះថ្នាក់ និងគួរឱ្យខ្លាចជាសាធារណៈរួមទាំងការវាយប្រហារសងសឹកលើគូប្រជែង។ ប្រមុខប៉ូលិសរូបនេះក៏ព្រមានផងដែរថាកុមាររាប់សិបនាក់ដែលមានអាយុចន្លោះពី ៨ ទៅ ១៤ ឆ្នាំត្រូវគេសង្ស័យថាពាក់ព័ន្ធនឹងអំពើប្លន់ហើយអាចត្រៀមរួចជាស្រេចក្នុងការចូលរួមក្នុងឧក្រិដ្ឋកម្មហិង្សាបន្ថែមទៀតផងដែរ៕
![](https://i0.wp.com/cdn.nctc.gov.kh/2019/12/Malmo-gang-task-force.jpg?resize=696%2C391&ssl=1)
ប្រភព RT ចុះផ្សាយថ្ងៃទី ១៦ ខែធ្នូ ឆ្នាំ ២០១៩