សហរដ្ឋអាមេរិកជំទាស់នៅថ្ងៃអង្គារលើសេចក្តីព្រាងសេចក្តីសម្រេចចិត្តមួយស្នើឡើងដោយប្រទេសចិន និងរុស្ស៊ីដែលនឹងបញ្ឈប់ការដាក់ទណ្ឌកម្មរបស់អង្គការសហប្រជាជាតិលើការនាំចេញសំខាន់ៗរបស់ប្រទេសកូរ៉េខាងជើង។ ភ្នាក់ងារព័ត៌មាន AP រាយការណ៍ថា ទីក្រុងវ៉ាស៊ីនតោនចាត់ទុកវិធានការនេះថា ជាវិធានការលឿនពេកដោយលើកឡើងពីកំណើននៃការគំរាមកំហែងរបស់ក្រុងព្យុងយ៉ាង។ សេចក្តីព្រាងដំណោះស្រាយដែលផ្សព្វផ្សាយដល់សមាជិកក្រុមប្រឹក្សាសន្តិសុខអង្គការសហប្រជាជាតិនឹងបញ្ឈប់ការដាក់ទណ្ឌកម្មលើការនាំចេញរបស់ប្រទេសកូរ៉េខាងជើងរួមទាំងលើការនាំចេញវាយនភណ្ឌ និងគ្រឿងសមុទ្រដោយមានគោលបំណងលើកកម្ពស់ជីវភាពរស់នៅរបស់ប្រជាជនស៊ីវិល។ សេចក្តីសម្រេចនោះថែមទាំងលុបចោលបម្រាមលើប្រជាជនកូរ៉េខាងជើង ដែលកំពុងធ្វើការនៅក្រៅប្រទេស និងបញ្ចប់សេចក្តីសម្រេចចិត្តធ្វើមាតុភូមិនិវត្តន៍ជន ដែលរកប្រាក់ចំណូលនៅបរទេសនៅត្រឹមថ្ងៃទី២២ ខែធ្នូ។ ក្រសួងការបរទេសសហរដ្ឋអាមេរិកនិយាយថា ប្រធានាធិបតីលោកដូណាល់ត្រាំនៅតែប្តេជ្ញាធ្វើឱ្យមានការរីកចម្រើនលើការតាំងចិត្តដែលលោកធ្លាប់ធ្វើជាមួយមេដឹកនាំកូរ៉េខាងជើងលោកគីមជុងអ៊ុននៅក្នុងកិច្ចប្រជុំកំពូលលើកដំបូងរបស់ពួកគេនៅប្រទេសសិង្ហបុរីក្នុងខែមិថុនាឆ្នាំ២០១៨ ស្តីពីការផ្លាស់ប្តូរទំនាក់ទំនងរវាងប្រទេសទាំងពីរ៕
ប្រភពព័ត៌មានRT ផ្សាយថ្ងៃទី១៨ ខែធ្នូ ឆ្នាំ២០១៩
