ប្រធានបុគ្គលិករបស់លោកស្រី Angela Merkel មានប្រសាសន៍នៅថ្ងៃព្រហស្បតិ៍ថាជំងឺរាតត្បាតកូវីដ១៩ នឹងបន្តយ៉ាងហោចណាស់ដល់ចុងឆ្នាំនេះ។
លោក Helge Braun ប្រាប់វិទ្យុ Deutschlandfunk ថា៖ “យើងអាចនឹងមិនរស់ក្រោយពីចប់ស្ថានភាពជំងឺរាតត្បាត ឬយើងកំពុងរស់នៅក្នុងស្ថានការណ៍ជំងឺរាតត្បាត យ៉ាងណាក៏យើងស្ថិតក្នុងស្ថានភាពមួយក្នុងចំណោមស្ថានភាពទាំងពីរ ហើយយ៉ាងហោចណាស់ស្ថានភាពនឹងបន្តរហូតដល់ដាច់ឆ្នាំ”
លោកស្រី Merkel អធិការបតីអាល្លឺម៉ង់ បានប្រកាសពីវិធានការណ៍នានានៅថ្ងៃពុធដើម្បីដកចេញនូវវិធានការណ៍បិទដំណើរនៅក្នុងប្រទេស ស្របពេលជាមួយគ្នានេះ លោកស្រីបានបង្កើតយន្តការ “ទប់បន្ទាន់” ដែលអនុញ្ញាតឱ្យមានការរឹតបន្តឹងជាថ្មីក្នុងករណីដែលមានការឆ្លងសារជាថ្មីម្តងទៀត។
មន្ត្រីសុខាភិបាលជាន់ខ្ពស់អាឡឺម៉ង់បានព្រមាននៅថ្ងៃព្រហស្បតិ៍ថា អាចមានរលកចម្លងមេរោគកូវីដ១៩លើកទី២ មុនរដូវស្លឹកឈើជ្រុះដោយអាស្រ័យលើអាកប្បកិរិយារបស់ពលរដ្ឋ។ ប្រធានវិទ្យាស្ថាន Robert Koch Institute សម្រាប់ជំងឺឆ្លងមានប្រសាសន៍ថា ចំនួនករណីឆ្លងកំពុងធ្លាក់ចុះ ប៉ុន្តែនេះមិនទាន់ក្លាយជាសញ្ញាច្បាស់ទេ៕
ប្រភពព័ត៌មានRT ផ្សាយថ្ងៃទី០៧ ខែឧសភា ឆ្នាំ២០២០
