ទិន្នន័យសម្ងាត់របស់អ្នកមានផ្ទុកមេរោគអេដស៍ ចំនួន១៤២០០នាក់ ភាគច្រើនជាជនបរទេស ត្រូវបានគេចូលលួចនិងផ្សព្វផ្សាយជាសាធារណៈតាមប្រព័ន្ធអ៊ីនធ័រនែត។ នេះបើតាមសេចក្តីប្រកាសរបស់អាជ្ញាធរសិង្ហបុរីកាលពីម្សិលមិញ។ ក្នុងរវាងតែប៉ុន្មានខែសោះ សិង្ហបុរី បានជួបបញ្ហាសន្តិសុខអ៊ីនធ័រនែតដ៏ធ្ងន់ធ្ងរដល់ទៅពីរលើក។
នៅក្នុងការវាយប្រហារអ៊ីនធ័រនែត ដ៏ធ្ងន់ធ្ងរមួយ កាលពីខែមិថុនា និងកក្កដា ទិន្នន័យសុខភាពរបស់ពលរដ្ឋសិង្ហបុរីជាង១,៥លាននាក់ រួមទាំងទិន្នន័យសុខភាពរបស់លោកនាយករដ្ឋមន្ត្រីផង ត្រូវបានគេលួចយកបាន។ អាជ្ញាធរសិង្ហបុរី សង្ស័យថាការវាយប្រហារនេះជាស្នាដៃរបស់រដ្ឋមួយ តែមិនបានបញ្ចេញឈ្មោះប្រទេសនោះឡើយ។
ពេលនេះ មានការលួចទិន្នន័យសុខភាពទៀត តែក្នុងទម្រង់ផ្សេង។ បុគ្គលម្នាក់ បានចូល ដោយគ្មានការអនុញ្ញាត ទៅលួចយកទិន្នន័យសម្ងាត់ រួចផ្សព្វផ្សាយតាមប្រព័ន្ធអ៊ីនធ័រនែត។ នេះបើតាមសេចក្តីថ្លែងការណ៍របស់ក្រសួងសុខាភិបាលសិង្ហបុរី អមដោយពាក្យសុំទោស ទៅកាន់ជនរងគ្រោះទាំងអស់។ ខ្លឹមសារនៃទិន្នន័យសម្ងាត់ ដែលគេផ្សព្វផ្សាយមានដូចជា អត្តសញ្ញាណអ្នកជំងឺ លេខសម្គាល់អ្នកជំងឺ ព័ត៌មានលម្អិតទាក់ទងនឹងបុគ្គលអ្នកជំងឺ (អាស័យដ្ឋាន លេខទូរស័ព្ទ …) លទ្ធផលនៃការធ្វើតេស្តសរកមេរោគហ៊ីវ HIV និងព័ត៌មានទាក់ទងនឹងសុខភាពជាច្រើនផ្សេងទៀត។
នៅក្នុងចំណោមទិន្នន័យនៃអ្នកជំងឺអេដស៍ដែលគេលួចបានទាំងជាង១៤២០០នាក់ មាន៥៤០០នាក់ជាជនជាតិសិង្ហបុរី ដែលបានឆ្លងមេរោគអេដស៍មុនខែមករាឆ្នាំ២០១៣ និងជាង៨៨០០នាក់ជាជនបរទេស ដែលមកវិភាគនិងរកឃើញថាមានផ្ទុកមេរោគហ៊ីវ មុនខែធ្នូឆ្នាំ ២០១១។ មានប្រជាជនតែប្រមាណជាង៥,៦លាននាក់ តូច តែមានបានជាងគេនៅក្នុងតំបន់អាស៊ីអាគ្នេយ៍ សិង្ហបុរីទទួលព្យាបាលជនបរទេសច្រើនណាស់ក្នុងមួយឆ្នាំៗ។
ក្រសួងសុខាភិបាលសិង្ហបុរីគិតថា អ្នកដែលបានបង្ហោះនិងមានទិន្នន័យសម្ងាត់ក្នុងដៃ គឺជាជនជាតិអាមេរិកឈ្មោះ Mikhy K Farrera Brochez ដែលធ្លាប់រស់នៅក្នុងប្រទេសសិង្ហបុរី ពីឆ្នាំ២០០៨-២០១៦ និងធ្លាប់ត្រូវបានតុលាការកាត់ទោសជាច្រើនដងមកហើយ ពីបទប្រព្រឹត្តគ្រឿងញៀន។ ជននេះអាចលួចទិន្នន័យសម្ងាត់បាន ដោយមានជំនួយពីមិត្តកំណាន់ចិត្ត ជាតិសិង្ហបុរី ជាវេជ្ជបណ្ឌិត ដែលតុលាការកាត់ទោសរួចហើយឱ្យជាប់ពន្ធនាគារ២៤ខែ ពីបទសុំគ្រលំធ្វើសកម្មភាពឧក្រិដ្ឋ។ អាជ្ញាធរសិង្ហបុរីក៏បានអំពាវនាវសុំឱ្យប្រទេសផ្សេងទៀតជួយ ព្រោះជនអាមេរិកជាប់សង្ស័យគេចចេញសិង្ហបុរីបាត់ទៅហើយ៕
