ចាប់ពីថ្ងៃទី០១ខែមករាឆ្នាំ២០១៩ទៅ អ្នកចង់ជក់បារីឬប្រើប្រាស់ផលិតថ្នាំជក់នៅក្នុងប្រទេសសិង្ហបុរី ត្រូវតែមានអាយុចាប់ពី១៩ឆ្នាំឡើង។ ការកំណត់នេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលសិង្ហបុរី ដើម្បីកាត់បន្ថយការប្រើប្រាស់ផលិតផលថ្នាំជក់នៅក្នុងប្រទេស។ តាមច្បាប់ចាស់អ្នកអាចប្រើប្រាស់ផលិតផលថ្នាំជក់បាន កំណត់អាយុត្រឹម១៨ឆ្នាំប៉ុណ្ណោះ ប៉ុន្ដែតាមការធ្វើកំណែទម្រង់ច្បាប់ស្ដីពីថ្នាំជក់ បានកំណត់សារជាថ្មីនូវអាយុអ្នកអាចប្រើប្រាស់ផលិតផលនេះបាន។
ផែនការរបស់រដ្ឋាភិបាលគឺនឹងកំណត់ អ្នកមានសិទ្ធិប្រើប្រាស់ផលិតផលថ្នាំជក់ស្របច្បាប់នៅអាយុ២១ឆ្នាំ ដែលផែនការនេះនឹងសម្រេចទាំងស្រុងនៅឆ្នាំ២០២១។ មានន័យថានៅឆ្នាំ២០២០និងដំឡើងមួយឆ្នាំ ហើយឆ្នាំ២០២១នឹងដំឡើងមួយឆ្នាំទៀត។ ចាប់ពីឆ្នាំ២០២១ទៅអ្នកប្រើប្រាស់ថ្នាំជក់អាយុក្រោម២១ឆ្នាំ នឹងមិនត្រូវបានការអនុញ្ញាតជាដាច់ខាត។
ចំពោះអ្នកលក់ដែលលក់ឲ្យជនអាយុតិចជាងច្បាប់បានកំណត់ នឹងត្រូវពិន័យជាប្រាក់៥ពាន់ដុល្លារសិង្ហបុរីសម្រាប់បទល្មើសទីមួយ ហើយនឹងពិន័យ១ម៉ឺនដុល្លារសិង្ហបុរីសម្រាប់បទល្មើសជាបន្ដបន្ទាប់។ លើសពីនេះទៅទៀត អាជ្ញាប័ណ្ណលក់ផលិតផលថ្នាំជក់របស់ពួកគេនឹងត្រូវផ្អាកសម្រាប់បទល្មើសទីមួយ ហើយនឹងត្រូវដកហូតតែម្ដងសម្រាប់បទល្មើសបន្ទាប់។
ទន្ទឹមនឹងនេះដែរ បុគ្គលដែលផ្គត់ផ្គង់ផលិតផលថ្នាំជក់ទៅឲ្យអ្នកមានអាយុក្រោមច្បាប់អនុញ្ញាត នឹងប្រឈមការដាក់ទោសផងដែរ។ អ្នកដែលទិញផលិតផលថ្នាំជក់ឲ្យអ្នកមិនទាន់គ្រប់អាយុ នឹងទទួលពិន័យរហូតដល់២,៥០០ដុល្លារសិង្ហបុរី សម្រាប់បទល្មើសទីមួយ ហើយ៥ពាន់ដុល្លារសម្រាប់បទល្មើសបន្ទាប់។ ដោយឡែកអ្នកដែលឲ្យផលិតផលថ្នាំជក់ទៅឲ្យជនក្រោមអាយុកំណត់ នឹងពិន័យ៥០០ដុល្លារសិង្ហបុរីសម្រាប់បទល្មើសដំបូង និង១ពាន់ដុល្លារសម្រាប់បទល្មើសបន្ទាប់។ ជនអាយុក្រោមការកំណត់ដែលជាអ្នកជក់ នៅពេលចាប់ខ្លួនបានពេលកំពុងទិញ ឬមានផលិតផលថ្នាំជក់នៅក្នុងដៃ អាចពិន័យរហូតដល់៣០០ដុល្លារសិង្ហបុរី៕
