នៅថ្ងៃព្រហស្បតិ៍ ទី១៣ ម្សិលមិញ អាជ្ញាធរប៉ូលិសនៅក្នុងប្រទេសនីហ្សេរីយ៉ាបញ្ជាក់ថា មនុស្សយ៉ាងតិចចំនួន១៤នាក់ត្រូវក្មាន់កាំភ្លើងបាញ់សម្លាប់នៅពេលដែលខ្មាន់កាំភ្លើងទាំងនោះចូលលុកលុយភូមិមួយនៅភាគខាងជើងប្រទេសនីហ្សេរីយ៉ា។
អ្នកនាំពាក្យម្នាក់របស់ប៉ូលិសលោក Wasiu Abiodun មានប្រសាសន៍ថា មនុស្សចំនួន០៥ នាក់ផ្សេងទៀតរងរបួសដោយសារគ្រាប់កាំភ្លើងក្នុងហេតុការណ៍នៅថ្ងៃពុធនៅភូមិ Ukuru ក្នុងតំបន់រដ្ឋាភិបាល Mariga។ លោក Abiodun មានប្រសាសន៍ថា គេសង្ស័យថា ខ្មាន់កាំភ្លើងទាំងនោះជាចោរប្លន់ខណៈដែលពួកគេក៏បានលួចសត្វគោក្របីផងដែរ។
យោងតាមប្រភពព័ត៌មានពីលោក Ashafa Maikera មេដឹកនាំក្រុមអ្នកឃ្លាំមើលក្នុងតំបន់បានឱ្យដឹងថា ក្រុមចោរបានជិះម៉ូតូចូលក្នុងភូមិដោយប្រើម៉ូតូចំនួន៥០គ្រឿងនៅយប់មួយមុនពេលធ្វើការវាយប្រហារ។
លោក Maikera បន្ថែមថា រហូតមកដល់ពេលនេះគេរកឃើញសាកសពបុរសចំនួន១៣នាក់ និងសាកសពស្រីចំនួន០១នាក់ ក្រោយពីការវាយប្រហារនោះ។ លោកបន្ថែមថា ក្នុងចំណោមសាកសពទាំងក៏មានសមាជិកក្រុមអ្នកឃ្លាំមើលក្នុងតំបន់ផងដែរ។
ប៉ូលិសនិយាយថា ពួកគេបានបើកការស៊ើបអង្កេតលើការវាយប្រហារនេះ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី១៤ ខែសីហា ឆ្នាំ២០២០
