ប្រទេសប៉ាគីស្ថានជម្រុញឱ្យក្រុមតាលីបង់ធ្វើការពិភាក្សាគ្នាជាមួយរដ្ឋាភិបាលអាហ្វហ្គានស្ថានឲ្យបានឆាប់ៗ ដើម្បីបញ្ចប់ជម្លោះដែលមានរយៈពេលជាច្រើនទសវត្ស ដោយប្រាប់មន្ត្រីដែលចុះទៅសួរសុខទុក្ខថា ការសន្ទនាគ្នារវាងប្រទេសអាហ្វហ្គានីស្ថាន និងក្រុមតាលីបង់នឹងអាចធានាបាននូវស្ថេរភាពនៅក្នុងតំបន់។
ជំនួបរវាងរដ្ឋមន្ត្រីការបរទេសប៉ាគីស្ថានលោក Shah Mahmood Qureshi និងគណៈប្រតិភូតាលីបង់នៅថ្ងៃអង្គារធ្វើឡើងនៅពេលដែលដំណើរការសន្តិភាពរបស់ប្រទេសអាហ្គានស្ថាននៅតែមានការជាប់គាំងដោយសារតែមានការខ្វែងគំនិតគ្នាលើការដោះដូរអ្នកទោស។
លោក Qureshi មានប្រសាសន៍នៅក្នុងសេចក្តីថ្លែងការណ៍មួយក្រោយពីបានជួបជាមួយគណៈប្រតិភូដឹកនាំដោយប្រធានការិយាល័យនយោបាយរបស់តាលីបង់គឺលោក Mullah Abdul Ghani Baradar ថា៖ “ប្រទេសប៉ាគីស្ថានចង់ឃើញកិច្ចពិភាក្សារវាងប្រទេសអាហ្វហ្គានស្ថានចាប់ផ្តើមនៅពេលឆាប់ៗដើម្បីធានាឲ្យបាននូវសន្តិភាព និងស្ថេរភាពក្នុងតំបន់។ កិច្ចពិភាក្សារវាងក្រុមតាលីបង់ និងគណៈកម្មាធិការរបស់រដ្ឋាភិបាលអាហ្វហ្គានស្ថាននឹងធ្វើឡើងនៅរដ្ឋធានី Doha ក្រោយពីមានការបញ្ចប់ការដោះដូរអ្នកទោសរវាងភាគីទាំងពីរ “។
ប៉ុន្តែការដោះដូរត្រូវបានពន្យារពេលដោយមានការខ្វែងគំនិតគ្នារវាងក្រុមតាលីបង់ និងរដ្ឋាភិបាលអាហ្វហ្គានីស្ថាន។ លើសពីនេះក៏មានការព្រួយបារម្ភផងដែរអំពីការកើនឡើងនូវអំពើហិង្សាដែលអ្នកការទូតនិយាយថា ត្រូវការទំនុកចិត្តបន្ថែមសម្រាប់កិច្ចពិភាក្សានេះ។ រហូតមកដល់ពេលនេះ ក្រុមប្រដាប់អាវុធបានបដិសេធលើការអនុវត្តបទឈប់បាញ់មុនពេលមានកិច្ចពិភាក្សាចាប់ផ្តើម។
លោក Qureshi មានប្រសាសន៍នៅក្នុងសន្និសីទសារព័ត៌មានខ្លីមួយថា “យើងបានពិភាក្សាលើបញ្ហាដ៏ស្មុគស្មាញ និងវិធីទាំងឡាយណាដែលអាចជាដំណោះស្រាយលើបញ្ហាទាំងនោះ” ។ ទោះបីជាមិនទាន់ច្បាស់ថា ការកាត់បន្ថយអំពើហឹង្សាត្រូវបានពិភាក្សាក៏ដោយអ្នកការទូតនិយាយថា កងកម្លាំងប៉ាគីស្ថានដែលជាអ្នកនាំមុខគេក្នុងតំបន់បានជម្រុញឱ្យមានការកាត់បន្ថយអំពើហឹង្សា និងបើកផ្លូវសម្រាប់កិច្ចចរចាសន្តិភាព។
កិច្ចប្រជុំនៅថ្ងៃអង្គារនេះក៏មានការចូលរួមពីលោកឧត្តមសេនីយ៍ទោ Faiz Hameed ប្រធានទីភ្នាក់ងារចារកម្មអន្តរសេវាកម្ម (ISI) របស់ប៉ាគីស្ថានផងដែរ។
ក្រុមអ្នកវិភាគនិយាយថា ភ្នាក់ងារចារកម្មធ្លាប់មានទំនាក់ទំនងជិតស្និទ្ធជាមួយក្រុមប្រដាប់អាវុធនៅក្នុងប្រទេសអាហ្វហ្គានីស្ថាន ដែលមានជាប់ទាក់ទងនឹងការលុកលុយរបស់សហភាពសូវៀតមកលើប្រទេសអាហ្វហ្គានីស្ថាននៅចុងទសវត្សឆ្នាំ១៩៨០ និងបន្តអនុវត្តឥទ្ធិពលមួយចំនួនលើក្រុមតាលីបង់។
ប៉ុន្តែភាពតានតឹងនៅតែមានកម្រិតខ្លាំងវវាង Islamabad និងទីក្រុងកាប៊ុលដោយរដ្ឋបាលរបស់លោកប្រធានាធិបតី Ashraf Ghani ធ្លាប់បានឈ្លោះប្រកែកគ្នាជាញឹកញាប់នៅក្នុងប្រទេសប៉ាគីស្ថានចំពោះការចោទប្រកាន់ថា ប្រទេសប៉ាគីស្ថានជាជម្រកផ្តល់មូលនិធិ និងផ្គត់ផ្គង់ដល់ក្រុមតាលីបង់។ ប្រទេសប៉ាគីស្ថាន ជាប្រទេសមួយក្នុងចំណោមប្រទេសចំនួន៣ ដែលទទួលស្គាល់ក្រុមតាលីបង់ នៅពេលដែលក្រុមតាលីបង់គ្រប់គ្រងក្នុងប្រទេសនេះនៅចន្លោះឆ្នាំ១៩៩៦ និងឆ្នាំ២០០១។ ប្រទេសប៉ាគីស្ថានបានបដិសេធចំពោះការលើកឡើងនេះ។
ប្រែសម្រួល៖ ប៉ោក លក្ខិណា
ប្រភពព័ត៌មាន Aljazeera ផ្សាយថ្ងៃទី២៦ ខែសីហា ឆ្នាំ២០២០