សហរដ្ឋអាមេរិកបាននិយាយនៅថ្ងៃអង្គារថា ពួកគេជំទាស់យ៉ាងខ្លាំងចំពោះប្រធានាធិបតីតួកគីលោក Tayyip Erdogan ដែលបានធ្វើជាម្ចាស់ផ្ទះឲ្យមេដឹកនាំ Hamas នៅក្នុងទីក្រុងអ៊ីស្តង់ប៊ុលនាពេលថ្មីៗនេះ ដោយជម្រុញឱ្យមានការឆ្លើយតបវិញឲ្យបានរហ័សពីទីក្រុងអង់ការ៉ា។
ក្រសួងការបរទេសនិយាយថា ក្រុមមន្ត្រីចាត់ទុកថា ក្រុម Hamas ជាភេរវករសកលហើយសហរដ្ឋអាមេរិកកំពុងស្វែងរកព័ត៌មានពាក់ព័ន្ធនឹងការវាយប្រហារភេរវកម្ម ការប្លន់ និងការចាប់ជំរិតជាច្រើនរបស់ពួកគេ។
សេចក្តីថ្លែងការណ៍របស់រដ្ឋាភិបាលតួកគីនៅថ្ងៃសៅរ៍មានសេចក្តីថា លោក Erdogan បានទទួលគាវរៈកិច្ចលោក Ismail Haniyeh ប្រធានការិយាល័យនយោបាយ Hamas និងគណៈប្រតិភូអមដំណើរផ្សេងទៀត។
យ៉ាងណាមិញ នៅថ្ងៃអង្គារក្រសួងការបរទេសតួកគីនិយាយថា ទីក្រុងអង់ការ៉ាបានធ្វើការបដិសេធទាំងស្រុងចំពោះការរិះគន់របស់សហរដ្ឋអាមេរិកនិងអំពាវនាវឱ្យទីក្រុងវ៉ាស៊ីនតោនប្រើឥទ្ធិពលរបស់ខ្លួនលើគោលនយោបាយប្រកបដោយតុល្យភាពដែលនឹងជួយដោះស្រាយជម្លោះរវាងប្រទេសអ៊ីស្រាអែល និងប្រទេសប៉ាឡេស្ទីនជំនួសឱ្យការបម្រើតែផលប្រយោជន៍របស់ប្រទេសអ៊ីស្រាអែល។
ក្រសួងការបរទេសនិយាយថា ការប្រជុំនៅថ្ងៃសៅរ៍គឺជាការប្រជុំលើកទី២ នៅឆ្នាំនេះ ហើយលោក Erdogan បានស្វាគមន៍ដល់មេដឹកនាំក្រុមអ៊ីស្លាមប្រដាប់អាវុធដែលបានគ្រប់គ្រងតំបន់ហ្គាហ្សាអស់រយៈពេលជាងមួយទសវត្សរ៍ក្រោយពីមានកិច្ចប្រជុំមួយនៅថ្ងៃទី១ ខែកុម្ភៈ។
នៅក្នុងសេចក្តីថ្លែងការណ៍មួយលើកឡើងថា “ការបន្តផ្សព្វផ្សាយរបស់ប្រធានាធិបតីលោក Erdogan ចំពោះអង្គការភេរវករនេះជាកត្តាបំបែកប្រទេសតួកគីពីសហគមន៍អន្តរជាតិ ដែលធ្វើឱ្យអន្តរាយដល់ផលប្រយោជន៍របស់ប្រជាជនប៉ាឡេស្ទីន និងរារាំងដល់កិច្ចប្រឹងប្រែងជាសកលដើម្បីការពារការវាយប្រហារភេរវកម្មចេញពីតំបន់ហ្គាហ្សា (Gaza)” ។ ក្នុងសេចក្តីថ្លែងការណ៍មានសេចក្តីថា៖
“យើងបន្តលើកឡើងនូវការព្រួយបារម្ភរបស់យើងអំពីទំនាក់ទំនងរបស់រដ្ឋាភិបាលតួកគីជាមួយក្រុម Hamas ក្នុងកម្រិតខ្ពស់បំផុត” នៅក្នុងសេចក្ដីថ្លែងការណ៍របស់ខ្លួនក្រសួងការបរទេសតួកគីបាននិយាយថា“ ការប្រកាសតំណាងស្របច្បាប់របស់ក្រុម Hamas ដែលបានឡើងកាន់អំណាចក្រោយពីឈ្នះការបោះឆ្នោតប្រជាធិបតេយ្យនៅតំបន់ហ្គាហ្សា និងតួនាទីរបស់ក្រុមនៅក្នុងតំបន់នោះ ថាជាភេរវករនោះ នឹងមិនចូលរួមចំណែកក្នុងការខិតខំដើម្បីសន្តិភាពនិង ស្ថេរភាពនៅក្នុងតំបន់នោះទេ។
ទំនាក់ទំនងសហរដ្ឋអាមេរិកជាមួយសម្ព័ន្ធមិត្តណាតូតួកគីមានភាពតានតឹងជុំវិញបញ្ហាជាច្រើនរួមមានទាំងបញ្ហាការទិញប្រព័ន្ធការពាររុស្ស៊ី S-400 របស់ទីក្រុងអង់ការ៉ា ដែលជំរុញឱ្យទីក្រុងវ៉ាស៊ីនតោនផ្អាកការចូលរួមរបស់ប្រទេសតួកគីនៅក្នុងកម្មវិធីយន្តហោះ F-35 របស់ខ្លួន និងធ្វើការគម្រាមកំហែងដល់ការដាក់ទណ្ឌកម្មនានា។
ការដោះដូរនៅថ្ងៃអង្គារបានកើតឡើងនៅរយៈពេលតែប៉ុន្មានម៉ោងប៉ុណ្ណោះក្រោយពីប្រធានាធិបតីអាមេរិកលោក Donald Trump បានកោតសរសើរចំពោះលោក Erdogan ក្នុងការដោះលែងគ្រូគង្វាលជនជាតិអាមេរិកឈ្មោះ Andrew Brunson នៅឆ្នាំមុនក្រោយពីឃុំខ្លួនអស់រយៈពេល២ឆ្នាំ។
ប្រែសម្រួល៖ប៉ោក លក្ខិណា
ប្រភពព័ត៌មាន Reuters ផ្សាយថ្ងៃទី២៦ ខែសីហា ឆ្នាំ២០២០
