យោងតាមប្រភពមជ្ឈមណ្ឌលកូរ៉េសម្រាប់ការត្រួតពិនិត្យ និងបង្ការជំងឺ(KCDC) បានឱ្យដឹងថា នៅថ្ងៃសុក្រប្រទេសកូរ៉េខាងត្បូងរាយការណ៍ថា ពុំមានករណីឆ្លងជំងឺកូវីដ១៩ថ្មីនៅក្នុងតំបន់ជាលើកដំបូងចាប់តាំងពីខែកុម្ភៈមក។
របាយការណ៍នេះបង្ហាញពីការឆ្លងថ្មីចំនួន៤ករណី ដែលជាសុទ្ធតែជាករណីឆ្លងនាំចូលទាំងអស់ ហើយចំនួនអ្នកឆ្លងជំងឺកូវីដ១៩ មានចំនួនសរុប ១០ ៧៦៥ករណី។ ចំនួនអ្នកស្លាប់បានកើនឡើងដល់២៤៧នាក់ ខណៈពលរដ្ឋចំនួន៩០៥៩នាក់ត្រូវបានអនុញ្ញាតិឱ្យវិលត្រលប់ទៅផ្ទះវិញ។ សេចក្តីថ្លែងការណ៍ KCDC បាននិយាយថា ករណីឆ្លងនាំចូលទាំងអស់មានចំនួនសរុប ១ ០៦៥ករណី ហើយពលរដ្ឋច្រើនជាង ៩០ភាគរយជាជនជាតិកូរ៉េ។
អាជ្ញាធរសុខាភិបាលក៏បាននិយាយផងដែរថា ពុំមានការឆ្លងតាមមូលដ្ឋានណាមួយបានកើតឡើងនៅក្នុងការបោះឆ្នោតសភានៅក្នុងខែនេះទេ ដោយអាជ្ញាធរបានអនុវត្តន៍វិធានការរក្សាសុវត្ថិភាព៕
![](https://i0.wp.com/cdn.nctc.gov.kh/2020/05/photo_2020-05-01_16-05-49.jpg?resize=696%2C391&ssl=1)
ប្រភពព័ត៌មានRT ផ្សាយថ្ងៃទី៣០ ខែមេសា ឆ្នាំ២០២០