នៅយប់ថ្ងៃទី០៧ ឈានចូលថ្ងៃព្រហស្បតិ៍ ទី០៨ ខែកញ្ញា ក្រុមហ៊ុន Apple បានធ្វើការប្រកាសចេញនូវផលិតផលបច្ចេកវិទ្យាថ្មីៗរបស់ខ្លួន ដែលផលិតផលចម្បងដែលយើងទន្ទឹងរង់ចាំនោះគឺជាទូរស័ព្ទត្រកូល iPhone 14។
ក្នុងឆ្នាំនេះ ក្រុមហ៊ុន Apple បាននាំយកទូរស័ព្ទ iPhone 14 ជំនាន់ថ្មីចំនួនបួនម៉ូដែល ដែលមានទូរស័ព្ទ iPhone 14 ធម្មតា, ទូរស័ព្ទ iPhone 14 Plus, ទូរស័ព្ទ iPhone 14 Pro និងទូរស័ព្ទ iPhone 14 Pro Max ដោយលែងមានម៉ូដែល mini ទៀតហើយ។
![](https://nctc.gov.kh/wp-content/uploads/2022/09/image-1.png)
ទូរស័ព្ទ iPhone 14 ធម្មតា និង iPhone 14 Plus ហាក់រក្សាការរចនាដដែល បើប្រៀបធៀបទៅនឹងទូរស័ព្ទដៃ iPhone ចាប់ពីជំនាន់ iPhone 11 ឡើងទៅ។ អតិថិជន ឬអ្នកប្រើប្រាស់ដែលនិយមគាំទ្រផលិតផលរបស់ក្រុមហ៊ុន Apple កំពុងតែផ្តោតចំណាប់អារម្មណ៍យ៉ាងខ្លាំងទៅលើម៉ូដែលចំនួន២ គឺ iPhone 14 Pro និង iPhone 14 Pro Max។
![](https://nctc.gov.kh/wp-content/uploads/2022/09/image-2.png)
ទូរស័ព្ទ iPhone 14 Pro និង 14 Pro Max ត្រូវបាននាំមកជាមួយការរចនាកាមេរ៉ាខាងមុខថ្មី ដោយប្តូរពីថ្ងាសឆកដែលយើងឃើញមានតាំងពីជំនាន់ទូរស័ព្ទ iPhone 11 មកកាន់ការរចនាកាមេរ៉ាខាងមុខបែបទម្លុះអេក្រង់វែងវិញ ដែលក្រុមហ៊ុន Apple បានឱ្យឈ្មោះថា “Dynamic Island”។ ក្រុមហ៊ុន Apple បាននិយាយថា ការរចនាកាមេរ៉ាស៊ែលហ្វីខាងមុខបែបទម្លុះអេក្រង់ “Dynamic Island” នេះ បានធ្វើការច្របាច់បញ្ចូលគ្នារវាង Software និង Hardware ដែលអនុញ្ញាតឱ្យអ្នកប្រើប្រាស់ធ្វើការមើលការចាក់ចម្រៀង, វីដេអូខល FaceTime ឬមុខងារកីឡាមួយចំនួនទៀតបានផងដែរ។ ជាមួយនឹងការរចនាកាមេរ៉ាទម្លុះអេក្រង់នេះដែរ ទូរស័ព្ទ iPhone 14 Pro បំពាក់មកជាមួយកាមេរ៉ាស៊ែលហ្វីទំហំ 12MP ដែលជាប្រភេទ Wide និង Depth សេនស័រ។
![](https://nctc.gov.kh/wp-content/uploads/2022/09/image-3.png)
និយាយពីផ្នែកខាងមុខរបស់ទូរស័ព្ទ iPhone 14 Pro ទូរស័ព្ទមួយនេះបំពាក់មកជាមួយអេក្រង់ Super Retina XDR មានកម្រិតពន្លឺ ២០០០ នីត ដែលស្មើនឹងការបង្កើនពីរដង បើប្រៀបធៀបទៅនឹងម៉ូដែលមុន។ ជាមួយនឹងអេក្រង់គុណភាពខ្ពស់នេះដែរ ក្រុមហ៊ុន Apple ក៏បាននាំយកនូវមុខងារ Always-On display មកបំពាក់នៅលើទូរស័ព្ទ iPhone 14 Pro ផងដែរ ដោយបន្ថែមពីនេះ អ្នកប្រើប្រាស់នឹងមិនតម្រូវឱ្យធ្វើការចុចលើអេក្រង់ដើម្បីប្រើប្រាស់មុខងារ Always-On display នោះទេ ដោយមុខងារនេះនឹងបង្ហាញអ្នកដោយផ្ទាល់ នៅពេលដែលអ្នកសម្លឹងមើលទៅទូរស័ព្ទ iPhone 14 Pro របស់អ្នក ហើយវាក៏បិទទៅវិញនៅពេលដែលអ្នកដាក់ទូរស័ព្ទទុកក្នុងហោប៉ៅ។
![](https://nctc.gov.kh/wp-content/uploads/2022/09/image-4.png)
![](https://nctc.gov.kh/wp-content/uploads/2022/09/image-5-1.jpg)
![](https://nctc.gov.kh/wp-content/uploads/2022/09/image-5-2.jpg)
ទូរស័ព្ទ iPhone 14 Pro នឹងដំណើរការនៅលើប្រព័ន្ធប្រតិបត្តិការ IOS 16 ហើយប្រព័ន្ធប្រតិបត្តិការជំនាន់ថ្មីនេះទៀតសោត ក៏បាននាំមកជាមួយមុខងារថ្មីៗមួយចំនួនផងដែរ ដូចជាមុខងារដែលអនុញ្ញាតឱ្យអ្នកប្រើប្រាស់ធ្វើការរចនា Widgets ថ្មីៗនៅក្នុងផ្ទាំងបង្ហាញ Lock Screen ជាដើម។
![](https://nctc.gov.kh/wp-content/uploads/2022/09/image-5-3.jpg)
បន្ថែមពីមុខងារដែលមានខាងលើ ក្រុមហ៊ុន Apple ក៏បាននាំមកជាមួយមុខងារសង្រ្គោះបន្ទាន់ថ្មីដោយភ្ជាប់ទៅនឹងផ្កាយរណប ដែលអាចអនុញ្ញាតឱ្យអ្នកប្រើប្រាស់ធ្វើការផ្ញើសារហៅជំនួយ បើទោះបីជាទូរស័ព្ទ iPhone 14 Pro របស់អ្នកពុំមានសេវាទូរស័ព្ទ ឬ Wi-Fi ក៏ដោយ។
![](https://nctc.gov.kh/wp-content/uploads/2022/09/image-5-4.jpg)
មុខងារសុវត្ថិភាពដ៏សំខាន់មួយទៀត ក៏មានបំពាក់នៅក្នុងទូរស័ព្ទ iPhone 14 Pro ផងដែរ ដែលជាមុខងារខលហៅរកជំនួយដោយស្វ័យប្រវត្តិ នៅពេលដែលទូរស័ព្ទដៃ iPhone 14 Pro របស់អ្នកស្វែងរកឃើញថាអ្នក បានជួបនូវគ្រោះថ្នាក់ចរាចរណ៍ដែលមិនអាចធ្វើការខលទៅ 911 ដើម្បីរកជំនួយបាន។
![](https://nctc.gov.kh/wp-content/uploads/2022/09/image-5-5.jpg)
ចេញពីមុខងារនៅក្នុងទូរស័ព្ទដៃ iPhone 14 Pro ឥឡូវនេះ យើងមកក្រឡេកមើលកាមេរ៉ាខាងក្រោយរបស់ទូរស័ព្ទមួយនេះវិញម្តង ដោយទូរស័ព្ទ iPhone 14 Pro នៅរក្សាកញ្ចប់កាមេរ៉ាបីគ្រាប់ដដែល ប៉ុន្តែសម្រាប់លេនកាមេរ៉ាគោលមានទំហំធំជាងមុនរហូតដល់ទៅ 65% បើប្រៀបធៀបទៅនឹងលេនកាមេរ៉ារបស់ទូរស័ព្ទ iPhone 13 Pro។ ដូចដែលបានលើកឡើងពីខាងដើម ទូរស័ព្ទ iPhone 14 Pro បំពាក់មកជាមួយកញ្ចប់កាមេរ៉ាខាងក្រោយចំនួនបីគ្រាប់ ដែលកាមេរ៉ាគោលមានទំហំ 48MP លេនកាមេរ៉ាថតរូបភាពទូលាយ (Ultra Wide) មានទំហំ 12MP និងលេនកាមេរ៉ាទំហំ 12MP ជាលេន Telephoto។
![](https://nctc.gov.kh/wp-content/uploads/2022/09/image-5-6.jpg)
ចូលមកកាន់ផ្នែកកម្លាំងម៉ាសុីនខាងក្នុងវិញ ទូរស័ព្ទ iPhone 14 Pro បំពាក់មកជាមួយបន្ទះឈីប A16 Bionic ដែលមាន 6-core CPU និងមានមុខងារមួយចំនួនផ្សេងទៀត ដែលជួយឱ្យទូរស័ព្ទ iPhone 14 Pro ដំណើរការបានលឿនផងដែរ។ ទូរស័ព្ទ iPhone 14 Pro អាចនឹងនាំមកជាមួយនឹងរ៉េមទំហំ 16GB និងជម្រើសអង្គផ្ទុកទិន្នន័យ 128GB 256GB 512GB និង 1TB។ សម្រាប់កម្លាំងថាមពលថ្មវិញ ក្រុមហ៊ុន Apple មិនបានធ្វើការបញ្ជាក់នោះទេ។
![](https://nctc.gov.kh/wp-content/uploads/2022/09/image-5.png)
ក្រុមហ៊ុន Apple បានដាក់ឱ្យធ្វើការកុម្មង់ទិញទូរស័ព្ទដៃ iPhone 14 នៅក្នុងសហរដ្ឋអាមេរិក ក្នុងតម្លៃដូចខាងក្រោម៖
_ iPhone 14 មានតម្លៃចាប់ពី $799 ឡើងទៅ
_ iPhone 14 Plus មានតម្លៃចាប់ពី $899 ឡើងទៅ
_ iPhone 14 Pro មានតម្លៃចាប់ពី $999 ឡើងទៅ
_ iPhone 14 Pro Max មានតម្លៃចាប់ពី $1099 ឡើងទៅ៕
![](https://nctc.gov.kh/wp-content/uploads/2022/09/image-6.png)
ប្រភព៖ Apple
អត្ថបទ៖ ប៉ោក លក្ខិណា